'Mbuccàte via Polare, arrète 'a Banghe,
a mana dritte, dopo via Zodiche,
vedìve l'aine fòre: ère na chianghe!
Nu uaglione ère sèmbe de servìzije
annand'a porte, d'a matìne 'a sère
e lucculàve forte: ère nu stràzije!
'U jurne p'i crapètte e i pìde 'e purche,
e 'a sère, m'arecorde:"E' cùtte, è cùtte,
'u turcenìlle a via Polare è cutte!
Da sope a sta vrascère annand'a porte
s'avezàve na nùvele de fume:
na nègghie p'u quartìre, dènze, forte
ca t'afferrave 'nganne, ma èra bèlle
'a'ddore 'i turcenìlle cùtte tanne,
ck'a 'nzogne, 'u putrusine e 'i stendenèlle.
Na sère, 'a case d'u cumbagne mije,
ch'abbetàve vecine a stu chianghìre,
decedèmme cke tutt''a cumbagnìje
de fa na cèna fòre, p'a cambagne:
e ognune, pe nen fa brutta fegùre,
purtàje na cose; dòlce, sciambagne,
panìne ck'u presutte, vine, frutte,
'a mùseche nemmène ce mangave,
ce stèmme p'abbijà, ce stève tutte.
Nen m'arecorde a chi venìje l'idèje:
"Accàtte 'i turcenìlle, sìnde 'a 'ddore?"
"Quille 'i magnàme dopo d'a pedèje!"
'A porte Troie ce assettàmme 'ndèrre
pigghjàje sti turcenìlle e ce ne jèmme,
e magnàmme, pazziàmme, rerèmme!
Na cose dopo n'àte, ù bucchieruzze,
arruvàje 'u mumènde 'i turcenìlle
pe fernèsce d'angjì 'u cannarùzze.
Cùme magnàje 'u prime me 'ndurzàje:
èra rumaste 'u cape d'u stendine
pròpede n'ganne e 'a stìnde l'angappàje
cke doja dète, e teràve, teràve!
Cke l'ucchjie ca m'ascèvene da fore,
ascève stu stendìne e s'allungave!
'i fèmmene che stèvene vecìne
rerèvene ca ère nu piacère,
se sckattàvene 'ngùrpe; qualu vine
l'avrìje putùte dà quèlla prièzze?
"'Ate ca prestegiatore, vite vì!
Lilì, sì maste!" E ije ère na pèzze!
Cacciàte cinghe mètre de stendìne
e 'a fife ca pigghjàje 'a sacce ije
'nganne me rumanìje 'u putrusine.
Nu pugne 'mbìtte e n'àte arrète 'e rine,
'u stùppele ascennìje, 'ngrazie a Dije:
s'èrene devertùte 'i signurine!
'I turcenìlle, uè, se fanne angòre,
da quella sère però, nn'i magne chiù,
vàche fujènne cùme sènd 'a 'ddore!